Díli, 21 Juñu 2026 (GMT News) – Kompañia aviasaun nasional Aero Dili ofisialmente lansa servisu voo direta entre Díli no Darwin iha loron Domingu ne’e, iha Aeroportu Internasional Prezidente Nicolau Lobato, Komoro, Díli, marka etapa importante ida ba reforsu konetividade entre Timor-Leste no Austrália.
Diretór Ezekutivu Aero Dili, Lourenço Oliveira, hato’o agradese ba entidade governamentál, parseiru no apoiadór sira hotu ne’ebé kontribui hodi realiza rota internasionál foun ida-ne’e. Nia afirma katak lansamentu voo Díli–Darwin sei loke dalan ba espansaun servisu Aero Dili ba destinasaun internasionál sira seluk iha futuru.
Embaixadora Austrália iha Timor-Leste, Caitlin Wilson, hato’o nia apresiasaun boot ba iniciativa Aero Dili nian. Nia konsidera katak ida-ne’e mak voo direta dahuluk hosi kompania aérea timoroan ba Austrália, no dehan katak ligasaun foun ne’e sei hametin relasaun entre povu rua, promove negósiu, turizmu no kontaktu entre komunidade sira iha nasaun rua.
Ministru Transportes no Komunikasaun, Eng. Miguel Marques Gonçalves Manetelu, lori Governu nia naran hato’o parabéns ba Aero Dili tanba nia vizaun, kompromisu no determinasaun atu lansa servisu aéreu internasionál importante ida-ne’e.
“Ida-ne’e mak marku signifikativu ida iha Timor-Leste nia dalan ba konetividade rejionál no globál ne’ebé boot liu. Ida-ne’e reflete ita-nia kompromisu koletivu atu hakbesik povu sira, fasilita komérsiu no investimentu, promove turizmu no kria oportunidade foun ba kresimentu ekonómiku sustentável,” dehan Ministru Manetelu.
Nia hateten tan katak hametin konetividade kontinua sai prioridade prinsipál Governu nian. Liuhosi Ministériu Transportes no Komunikasaun, Governu kompromete atu dezenvolve sistema transporte modernu, seguru, konfiável no efisiente hodi suporta dezenvolvimentu nasionál no hametin Timor-Leste nia integrasaun iha ekonomia rejionál no globál.
Ministru Manetelu mós hato’o apresiasaun ba Governu Austrália no parseiru sira hotu ne’ebé kontribui hodi transforma rota aérea foun ida-ne’e sai realidade.
Prezidente Repúblika, José Ramos-Horta, mós kongratula Aero Dili no Diretór Ezekutivu Lourenço Oliveira tanba nia lideransa no empenhu atu aumenta ligasaun aérea entre Timor-Leste no Austrália.
“Agradesimentu boot husi Governu no Estadu ba Diretór Ezekutivu Aero Dili, Lourenço Oliveira, nu’udar timoroan ida ne’ebé hatudu matenek no kapasidade atu kontribui ba dezenvolvimentu ekonómiku nasional no kria oportunidade servisu ba povu timoroan,” dehan Xefe Estadu.
Prezidente Ramos-Horta louva mós espéritu empreendedór Lourenço Oliveira nian ne’ebé investe iha setór aviasaun sivíl, hodi fó kontribuisaun ba dezenvolvimentu ekonomia nasional.
Lansamentu voo direta Díli–Darwin espera bele loke oportunidade ekonómika foun, aumenta movimentu ema no negósiu entre nasaun rua, no reforsa Timor-Leste nia konetividade ho mundu, hodi kontribui ba futuru ida ne’ebé prósperu no reziliente liután.
