Díli, 22 Juñu 2026 (GMT News) – Família saudozu Francisco Guterres Lú-Olo konfirma katak, hafoin diskusaun ho Governu, kadaver sei transporta husi Malázia mai Timor-Leste iha loron 23 Juñu ho aviaun Aero Díli.
Domingos Guterres, alin husi saudozu, hato’o sentimentu triste tebes ba lakon ne’e no agradese ba Governu, FRETILIN no povu Timor-Leste tanba solidariedade ne’ebé hatudu ba família durante momentu difísil ida ne’e. Tuir informasaun disponivel, kadaver sei to’o iha Aeroportu Internasionál Presidente Nicolau Lobato iha tuku 06:00 dadeer.
Sekretáriu Estadu Veteranus, César dos Santos da Silva “Merak”, hateten katak hafoin koordenasaun ho família, deside ona atu tau matebian iha rezidénsia Farol antes lori ba Jardim dos Heróis, Metinaro. Governu no Forsa Armadas Timor-Leste sei prepara serimónia ofisiál no parada militar atu simu saudozu lider rezisténsia, Prezidente FRETILIN no antigu Prezidente Repúblika ne’e ho honra Estadu nian.
