Prezidente Repúblika, Sua Exelénsia José Ramos-Horta, hato’o nia sentidu kondolénsia ba família, lideransa, kuadru no militante sira FRETILIN nian ba falesimentu eis-Prezidente Repúblika no Prezidente FRETILIN, Dr. Francisco Guterres Lú Olo, ne’ebé hakotu iis iha ospitál ida iha Kuala Lumpur, Malázia.
Iha nia deklarasaun ne'ebé publika iha nia pájina facebook José Ramos-Horta, Prezidente Ramos-Horta hateten katak nia simu notísia ne’e ho tristeza boot no konsidera falesimentu Dr. Francisco Guterres Lú Olo hanesan lakon boot ida ba Nasaun Timor-Leste. Nia mos haktuir katak durante nia vizita ba Malázia iha loron 13 to’o 16 fulan Juñu 2026, nia ba vizita Lú Olo iha Unidade Kuidade Intensivu (ICU) no rona diretamente relatóriu médiku kona-ba nia kondisaun saúde ne’ebé grave.
Prezidente Repúblika hateten katak, hafoin fila mai Dili, nia informa de’it ba jornalista sira katak nia ba ospitál atu haree kondisaun saúde eis-Prezidente Repúblika, no respeita privasidade família nian, la fó detallu kona-ba nia estadu kliniku. Nia mos partilla informasaun kona-ba gravidade kondisaun saúde Lú Olo nian ho lideransa máximu FRETILIN.
Tuir Ramos-Horta, Dr. Francisco Guterres Lú Olo mak patriota boot ida, líder importante iha luta ba libertasaun nasional, líder partidu istóriku FRETILIN no ema ida ne’ebé hala’o ona kargu aas hotu-hotu iha Estadu Timor-Leste.
Prezidente Repúblika hateten katak nia kontaktu ona Embaixadór Timor-Leste iha Malázia atu koordena prosesu nesesáriu hotu-hotu ba traslada korpu mai Timor-Leste, hamutuk ho família no instituisaun estadu sira. Nia mos kontaktu ona kompanhia aviasaun AERO DILI atu prepara voo espesial ida ba transporte korpu no família.
Prezidénsia Repúblika, iha koordenasaun ho órgaun estadu seluk, sei fó apoiu tomak no honra estadu ne’ebé konveniente ba eis-Prezidente Repúblika Dr. Francisco Guterres Lú Olo.
