Havana, 22 Juñu 2026 (GMT News) – Ramiro Valdés, komandante revolusaun komunista Cuba no figura importante ida iha kriasaun sistema intelijénsia nasaun nian, mate ho idade tinan 94. Prezidente Cuba, Miguel Díaz-Canel, konfirma noticia ne’e no hato’o homenagem ba Valdés, ne’ebé nia konsidera hanesan lider ida ho dedikasaun aas ba nasaun.

Valdés mak lider ida husi lider revolusaun Cuba sira ne’ebé sei moris to’o oras ne’e, no durante ninia moris nia luta hamutuk ho Fidel Castro, Raúl Castro no Ernesto 'Che' Guevara hasoru governu Fulgencio Batista. Hafoin revolusaun manán iha 1958, nia asume kargu importante sira iha Partidu Komunista Cuba no governu.

Durante nia servisu iha governu, Valdés ajuda estabelese servisu seguransa Estadu G2, ne’ebé sai instrumentu prinsipal ba monitorizasaun seguransa interna no externa Cuba. Nia mós servi dala rua nu’udar Ministru Interior no dala ida nu’udar Vice-Prezidente.

Anúnsiu kona-ba ninia mate mosu iha momentu ne’ebé Cuba aprova pakote reforma ekonómika foun, ne’ebé konsidera nu’udar mudansa boot liu iha estratéjia ekonómika nasaun nian desde revolusaun. Reforma sira ne’e buka habelar espasu ba negósiu privadu, investimentu no atividade komérsiu, atu ajuda responde ba difikuldade ekonómika ne’ebé nasaun enfrenta atualmente.